【無懼強權】王宗堯相信堅持終可「煲底見」 周庭轟警察本末倒置
蘋果日報 2019/12/25 19:14
周庭王宗堯啱channel
王宗堯昨晚在網媒「啱Channel」舉行的頒獎禮上，獲得「最意志堅定大獎」，他領獎時謙稱不只他一人堅持，還有杜汶澤、何韻詩、以及各路手足。問到會否相信終有一天「煲底見」？王宗堯即說：「信！今年雖然好轟烈，有好多前所未見嘅傷亡，有好多之前冇諗過香港發生嘅事，普通市民被無差別攻擊，有警察無差別打人、喺鬧市開槍，仲係實彈，5年前開咗87枚TG已經『嘩』，喺中大都2000幾枚TG。」
最近街頭抗爭似乎已緩和一點，大家應該如何繼續堅持下去？他說：「我覺得大家開始慢慢習慣咗呢個生活模式，開始識得分配自己嘅力，例如你會堅持每日都出去，或者選擇一個禮拜出去兩次，或者選擇今晚出去唱聖詩、倒數，呢啲係我哋以往都會做嘅嘢，全世界都會做嘅慶祝活動，我唔知點解今年大家特別敏感，一哥（警務處處長鄧炳強）又落咗尖沙嘴，好多時大家覺得冇佢哋又冇咁亂。」
至於周庭就得到「最佳日語演繹大獎」，她自嘲日文只是半桶水，只是希望運用自己的能力可以為香港做一點事。對於她早前參與阮民安MV《煲底之約》的拍攝，問她會否相信最後會煲底見？周庭說：「呢個係一個非常之困難嘅問題，每場社會運動不論喺香港又好，喺外國又好，本身要成功，都係好困難，因為我哋面對嘅對手係一個幾咁強大嘅政權，要去改變佢哋某一啲政策，係非常之困難嘅一件事，所以只能一直堅持。」
然而，最近的抗爭氣氛似有點緩和，會否擔心如14年佔中事件一樣無疾而終，周庭表示：「氣氛的確有上有落，但同14年嘅氣氛都幾唔同，不論大家參與嘅程度，警察暴力嘅程度，政府無恥嘅程度，同5年前係好唔同，所以好難作一個直接嘅對比，最重要係大家唔好忘記我哋嘅初心，唔好因為太多人中槍、受傷、坐監而麻木咗，呢啲唔係平常嘅事，我哋要努力爭取更加公平嘅社會。」
至於近日劫案頻生，周庭認為是本末倒置，「不論政府同警方冇諗過解決政策上或者制度上不民主嘅問題，亦都冇諗住解決市民嘅憤怒，純粹由表面點樣去減少警方同市民嘅接觸，其實呢個係冇意思，因為警察嘅責任係保護市民嘅生命財產嘅安全，但我哋而家見到警察都唔係做緊呢啲嘢，佢哋係危害緊市民嘅安全，呢啲先至係令到市民咁憤怒，民怨越演越烈嘅原因，必須由制度上去解決問題，而唔係制止大家去遊行、制止警察同市民嘅接觸，根本係冇意思。」
採訪：黃曉妍
攝影：仇志德、廖達燊
攝影：仇志德、廖達燊
王宗堯得到獲得「最意志堅定大獎」。
獲獎後更唱歌助慶。
王宗堯表示面對強大的政權，只有堅持和相信，終有一天可「煲底見」。
周庭獲頒「最佳日語演繹大獎」。
周庭直言警察暴力和政府無恥的程度，較14年雨傘運動高出不知多少倍。
周庭認為是政府和警察本末倒置才導致近日劫案頻生。