曼城都算財大氣粗，為咗阻止冇咗正選位嘅門將基雲轉投其他球會，竟然出動銀彈政策，提出續約同埋加人工。我求大俠真係好想知道，究竟基雲會揀落場比賽，定係坐喺後備席上白人工等退休呢？
英格蘭新晉國腳赫特喺新一季英超，從愛爾蘭球員基雲手上搶咗個正選位，做咗曼城頭號門神，仲喺作客打和熱刺0:0場揭幕戰中，有神乎奇技嘅演出，睇嚟基雲喺曼城應該係咁先。不過，話晒基雲係愛爾蘭國腳，質素有番咁上下，加上英超經驗豐富，所以唔愁冇出路，聽講富咸同阿仙奴都想打佢主意。

唔想佢走益友會

問題係，雖則曼城自己唔要，但又唔想益人，仲計劃用銀紙嚟綁住基雲。據報周薪係8萬鎊（約97萬港元）嘅基雲，同曼城仲有兩年合約，但曼城就利誘佢留低，除咗願意同佢續約至2015年，而且仲肯加佢人工。
以龍門嚟講，34歲嘅基雲唔算好大，但講真，我求大俠唔認為有英超球會可以好似曼城咁，開到一份8萬鎊以上嘅5年合約畀佢。作為喺頂級聯賽競逐嘅職業球員，當然希望落場，不過，喺後備席上坐5年就有逾2,000萬鎊（即2.4億港元）落袋，坦白講真係好吸引。查實曼城都係軟硬兼施，喺利誘嘅同時亦識得畀甜頭基雲，聽講喺禮拜四嘅歐霸盃，領隊文仙尼就會畀佢打正選。
另外，新加盟曼城嘅意大利前鋒巴洛迪利，一嚟到就鬼咁霸道，要隊友根寧咸讓件45號波衫畀佢。巴洛迪利咁話：「我一出道就着45號，嚟到曼城當然想用呢個號碼比賽。」巴洛迪利一嚟到就巴巴閉閉，希望佢可以踢出身價波，幫曼城攞到好成績啦。