張紋嘉(Crystal)今日喺商台接受訪問，佢透露之前去咗美國學戲劇3個月，雖然當時係零收入，但佢認為好值得：「識咗好多唔同國籍嘅人，隔籬班係model，又靚仔又高大又大隻，坐喺度都覺得特別有型。」有冇特登去識佢哋？Crystal笑住話：「咁又冇，我冇咁大膽，同埋佢哋好細個，19歲、21歲、22歲，識朋友係好，但進一步就唔會。」

最近，Crystal接咗一個由美國人寫嘅舞台劇，下星期開始排戲，準備2月公演，加上新一年又有好多計劃，未知係咪壓力太大，佢經常難以入睡，佢話：「HotCha有騷，希望搞得成，都有壓力，因為再面對以前嘅歌，啲歌好耐喇，希望我仲記得啦，要記番以前嘅嘢，諗起都覺得大壓力。」幾時開騷？佢表示：「o依家暫時希望係5、6月，其實未落實，但有同其他成員夾時間，大家都想有個好好演出。」

更多娛聞，喺晒《娛果》
http://fb.com/appledailyent