陳豪今日喺九龍城出席「大富翁華麗聖誕盛會」活動，呢排幾乎日日都見到陳豪，連佢自己都話好好運，今年好多工作，聽晚除夕有倒數活動，做完收工會再陪女友。

提到話林峯表示會退出娛樂圈，打理爸爸嘅地產生意，陳豪講笑話：「佢啲fans點算？林峯喺演藝圈咁活躍，希望佢唔好咁快心淡，機會仲有好多。」

前晚陳豪同林忠豪呢兩位廖碧兒嘅舊愛，齊齊出席銅鑼灣一個活動，雖然同場但冇碰頭，唔知係咪刻意安排呢？陳豪話：「我冇所謂，我又唔識佢，坦白講都過咗去，我個人比較睇得淡，唔當乜一回事，由入行開始，我就睇得開玩得開同吃得開，呢樣亦係我基本做人道理。」