當年今日
關於我們

香港國際爵士樂節 - 左丁山

蘋果日報 2008/09/30 00:00


大馬路上,碰到投資A,行得好快,開玩笑問佢係唔係趕去銀行,投資A話:「呢個時候唔講得笑,我同賓架P好熟,知道佢間銀行素來穩陣,資本充足比率高過14%,遠遠超過巴塞爾協議嘅要求,佢哋間銀行一定冇事嘅。」香港嘅銀行大都維持幾高嘅資本充足比率,一般高於世界水平,二十年來金管局嘅監管愈來愈嚴,連部門總經理之委任都要得到金管局OK,左丁山就對本地銀行制度好有信心。
問投資A有乜大動作呀?投資A就好好傾咯,立即搵地方坐低,傾耐啲,唔係講投資喎,呢排風大雨大,傾其他嘢冇咁煩惱。原來投資A係爵士音樂發燒友,唔止鍾意聽,仲私人拿出錢來,預備做蝕本生意,搞一個「香港國際爵士音樂節」(HongKongInternationalJazzFestival),請來一流高手BobJames與「上海天使」(AngelsofShanghai)夾Band演出,香港爵士樂手TedLo嘅NewYorkSeason,還有艾美獎得主Yellowjackets等等,於十一月十六日至二十二日在香港不同地方演出,例如Backstage、FringeClub等地方,亦有兩場比較大型嘅演奏會在灣仔伊館舉行(十一月二十日及二十一日),頭炮就係十一月十六日星期日在尖沙嘴文化中心廣場免費表演。
左丁山對爵士音樂唔熟,聽到明與唔明之間,投資A索性叫左丁山上網(www.hkjazz.org)睇清楚。投資A話自己工作多年,人生已無所求,退休後就會投身推廣爵士音樂事業,希望將香港擺上世界爵士樂地圖,成為亞洲最前列嘅爵士音樂中心。佢滿腹大計,希望能以商界經驗籌集資金,成立一個基金,培養本地爵士樂人才及宣揚爵士樂。左丁山勢估唔到呢位老友為咗爵士樂,竟然全身充滿動力,眼裏發光。搵齊幾位世界高手嚟香港,諗吓都頭暈,你估只係燒錢咁簡單乎。會唔會只係吸引到本地外國人參加爵士音樂節呢?投資A話外國人會係觀眾主力,但佢認為本地人應該有不少係爵士樂愛好者,知道之後會踴躍參加,一啲亞洲人可能會因此而專程來港旅行聽爵士音樂喎。投資A如此熱心,謹祝佢好運。