季後將會退役嘅湖人球星拜恩（Kobe Bryant）喺上周五最後一次到訪新奧爾良，正選上陣射入14分，可惜球隊以102:110輸畀有安東尼戴維斯（Anthony Davis）缺陣嘅塘鵝。

首次應粉絲要求再上陣

拜恩今場上陣22分鐘，每次掂波都引起球迷歡呼喝采，球迷喺最後八分鐘更狂嗌「我哋要Kobe！」，令教練史葛（Byron Scott）再次派佢上陣；今次亦係拜恩20年職業生涯中，首次因應球迷要求而重返球場比賽。當拜恩喺最後4分15秒被調離場嗰陣，所有球迷都起身向佢拍掌致敬。拜恩賽後表示：「呢種感覺真係好奇妙，球迷嘅反應實在難以置信。球迷嘅支持，係我力求進步嘅動力；希望我喺球場上嘅表現會啟發球迷，令佢哋想變得更好。」
史葛教練就透露，拜恩呢三場客場唔會打多過28分鐘，因為佢希望拜恩喺13日主場對爵士嘅告別戰打足全場，佢講笑話：「Kobe最後一場波想打幾耐都冇問題，只要佢唔嗌換人，我都會將佢留喺場上！」