上個月中先喺巴黎影婚紗相、俾路人發現兼踢爆正準備結婚，高圓圓同趙又廷呢段姊弟戀唔單止落落大方話你知「yes」，而且仲話咁快就拉埋天窗，前日喺北京註冊喇。

今日有雜誌報道，佢哋兩個係喺2012年拍電影《搜索》時譜出戀曲，之後就一直唔理其他人眼光，直認戀情，高調拍拖。不過報道當中就話，趙又廷爹哋知道兩人拍拖之後，曾經反對，因為除咗係姊弟戀之外(趙又廷29歲，高圓圓34歲)；又擔心高圓圓係內地人，怕佢同喺台灣成長嘅趙又廷會有文化差異。

趙爸爸又話，如果男、女雙方唔清楚了解對方嘅家庭環境的話，婚姻都會好易出問題喎。圓圓為咗證明自己有幾愛趙又廷，反而努力令未來夫家刮目相看，所以後來新老爺都對外大讚圓圓家教好又懂事。

前日一對新人就靜雞雞喺北京註冊成婚，原來仲已經喺台北嘅內湖區買咗樓共築愛巢，而圓圓仲會喺當地定居，仲話年尾就會擺酒添。