佔中九子早前被裁定罪成後，各人喺法院發表嘅陳情，都透過文字喺網上公開，觸動咗唔少香港人。網台D100為咗「為公義留聲」，早前喺審訊結束後，即時邀請佔中九子親自讀出庭上陳情，並製成《不是九個人的審判》有聲書，想為佔中案留下更完整嘅歷史紀錄。據知最早現身D100錄音室嘅朱耀明，由於讀起《敲鐘者言》陳情時情緒波動，所以要返屋企休息先，再由囝囝幫佢喺家中完成錄音。
八方同唔少人一樣，最想聽嘅可能係鍾耀華陳情－－「我沒有甚麼需要陳情。我們，包括在座的各位，是有責任走出法庭／議事庭／媒體／一切中介去親自理解世界，體悟世情。這全都不是這個法庭可以告知」。如果有得聽佢親口讀出，相信好有感染力，之但係九子中唯獨佢冇回覆，結果由公民黨創黨黨魁余若薇代為聲演。