之前我哋嘅蘋果採訪隊去咗北極直擊香港跑手去到極地成功完成馬拉松。而有份去跑馬拉松嘅一眾隊員其實仲成立咗一個叫GreenMonday嘅社會企業，今日仲係佢哋成立一周年紀念，大隊中午就去咗長沙灣一間小學呼籲全港35萬學生，喺學校午餐時間，每星期都有一日食素，藉以推動環保。

今日活動大使蔡一智、同喺北極唔小心扭傷腳嘅陳貝兒，仲有糖兄妹都一齊出席活動支持環保。阿智話自己其實戒咗羊、牛肉都成廿年喇，自己近來都開始每星期有一、兩日食素，連屋企小朋友都一齊食架。阿智仲話食素之後嘅健康仲連皮膚都會靚啲添。

提到日前五月天、梁詠琪因私人理由取消大馬嘅音樂會，阿智日前就同埋草蜢一齊出席演出，另外譚校長同巫啟賢都有去，表演完被大馬網民詐型，指為錢不理政治。阿智話自己唔知個表演同政治有關，佢話自己對大馬政治完全冇認識，加上經理人公司收到主辦單位嘅信件證明係無關政治嘅，所以尊重合約精神而出席。阿智仲話以後都會了解清楚表演嘅背景先，尤其係外地表演，因為香港藝人真係未必知發生咩事。