著名排舞師Sunny Wong今日喺會展搞嘅「Dance Union Dance Power Competition」進行總決賽，Sunny再次擔任評判，已經第7年做搞手嘅Sunny話想推動舞蹈文化，增添大家嘅出路同對社會嘅鬥志，佢話：「跳舞係好玩嘅，又健康，又可以畀大家創作空間，打開天空。」

Sunny最近就忙緊為許冠傑x譚詠麟演唱會同埋汪明荃演唱會排舞，佢就話要絞盡腦汁，仲大讚阿Sam同阿倫好合拍同好落力，狀態好好。而阿姐嘅演唱會就動用咗幾個排舞師，因為演唱會有唔同味道，又要配合番阿姐華麗嘅歌衫，不過佢就話怕啲舞蹈會難到阿姐。

另外，講到噚晚演藝人協會拍賣籌款晚宴，Sunny被即興叫上台跳舞籌款，Sunny就話：「係肥媽叫我上去跳舞，籌到3萬蚊，好開心可以幫到人，好玩又有氣氛，出發點係好。」