前組合SMAP成員香取慎吾、草彅剛及稻垣吾郎告別尊尼事務所，三子已再度合體開設共同fan club「新地圖」，並組成新公司CULEN，網台AbemaTV安排三子將一連三日亮相網上節目共72小時，與唔俾藝人肖像於網上出現嘅尊尼大唱反調。

隨住香取同尊尼事務所滿約，由香取主持16年嘅朝日電視台直播節目《SmaSTATION!!》都要收檔，噚晚深夜就播出最後一集。現年40歲嘅香取，從24歲開始主持《SmaSTATION!!》，不止佢唔捨得，大批觀眾及fans都對節目難捨難離，噚日大量人群聚集於朝日電視台門外，一身黑色打扮嘅香取落車即向大家揮手，其好友山本耕史都有俾面亮相，當節目去到尾聲，香取同主播拍檔大下容子剖白不捨心情，香取仲眼濕濕話：「好可惜，真係好可惜！本來想一直繼續做落去...」附近嘅東京鐵塔亦因呢日而換上藍色燈，香取心情百感交集，佢自言夢想成真，又話：「今集係699集，只差一集就700集，好想做多一集。」最後，香取同大下容子來個擁抱後，節目正式劃上句號。