雷神冇眼光揀錯?文家良炮製罕有「夫妻馬」孖寶
文家良李寶利董吳玲玲翡翠紅星翡翠福星翡翠劇院
跑馬有時真係好神奇!上周三(7日)晚谷草尾場「翡翠紅星」戰死沙場。事隔一周,馬主董中浩及董吳玲玲夫婦今晚(14日)在同一地點雙倍攞番,先係第六場董吳玲玲個人之「翡翠福星」由潘頓大熱掄元,繼而在最尾第八場三班1200米爆冷贏埋董中浩名下的「翡翠劇院」起孖。
文家良馬房「翡翠劇院」由李寶利執韁,這匹三歲馬在港跑至第六仗,終於打開勝門,今場單Win及組合獨贏A2分別派220及19元。
「翡翠劇院」同「翡翠福星」都係賽前在港未勝自購馬,兩駒正正係文家良這次谷戰兩匹王牌馬。當中「翡翠劇院」近兩場分別在李寶利及莫雷拉胯下跑第三及第四,今次雷神唔騎而揀「志友運」,「翡翠劇院」用番在港唯一上名騎師李寶利,首度出師快活谷,排8檔跑1200米,係22倍冷門。
結果「翡翠劇院」早段留住跑守四五位,直路從外叠望空長驅直進,以輕鬆姿態追過一度突圍的另一冷馬「超好玩」,小勝0.75馬位,在港第六次出賽初跑谷草順利開齋,文家良與「翡翠」系馬主攜手起孖,成為今晚谷戰主角,至於李寶利連續贏到第四次賽事,運氣持續暢旺。
第八場二至四名分別為「超好玩」、「志友運」及「愛樂寶」,四重彩派五萬九千幾,騎師王由巫顯東以30分擊敗少佢四分的莫雷拉勝出。