有份演出韓劇《她很漂亮》嘅SuperJunior（SJ）成員崔始源，上周四同東方神起嘅Max同日入伍，搞到好多粉絲大叫唔捨得oppa。好彩軍方即刻做嘢，公開咗始源同Max於軍中嘅情形，唔使各位粉絲心掛掛。

始源同Max上周向軍方報到，已經得到好多SM事務所同門如SJ成員利特、強仁、圭賢、EXO成員伯賢、Chen同SHINee嘅珉豪送行，估唔到二人入到訓練所受訓，依然超好人緣。大合照中，身穿軍服嘅始源坐在側邊，微笑望着鏡頭，坐姿豪邁，而佢身後嘅同袍仲幫佢加咗對牛角。而於另一張大合照中，Max同樣身穿軍服，佢緊握拳頭坐正中間，盡顯大哥哥風範。