韓國經典愛情片《我的野蠻女友》導演兼編劇郭在容，去年接受新挑戰，執導及編寫日本電影《遇上世界上另一個你》（Colors of Wind），電影韓日兩方合作，由日本人氣男星古川雄輝孖藤井武美擔演。《遇上世界上另一個你》於下周四在港開畫，郭在容近日來港宣傳，同時接受本報專訪，當中佢提到中、韓、日三地拍攝嘅分別時，提到大陸演員非常強勢，令人聯想到曾傳跟郭在容不和嘅大陸女星范冰冰。

郭在容曾拍攝中韓合資電影《再見阿妮》，問到中、韓、日三地電影製作上嘅分別時，郭在容坦言：「關於喺大陸拍戲，都唔知點答好。」又笑言：「喺大陸拍戲嗰個唔係我本人，係分身。」

郭在容之後表示：「一開始以為大陸地大物博，可以有好多靚景拍攝，但後來發現實際上係冇咩幫助，因為地點之間相距好遠，要花好多時間於交通上，最後都只係留喺同一個城市拍攝。而韓國雖然比較細，不過每個拍攝地點都好近，有時完成拍攝後仲可以返屋企，因而比較方便。」

郭在容又提到於大陸拍戲有另一個問題：「就係大陸演員比較強勢，會改拍攝日程，甚至改劇本，而且片酬非常貴，令製作費花咗大量比重於演員酬勞方面。」

而2012年，郭在容辭任范冰冰主演電影《楊貴妃》嘅導演，當時有指係由於范冰冰不斷要求加戲導致。事後郭在容曾表示中國電影唔可以太以演員為中心，要遵守合約精神，又指投資方太聽演員意見，覺得演員唔應該帶埋自己嘅編劇開工，矛頭疑似直指范冰冰。

至於喺日本拍攝，郭在容表示日本人做事比較微細，少少改動亦會牽動好多事，要再開會傾，因此拍攝過程比較繁複。

場地提供：
decanter, WHISK @ The Mira

更多韓流，喺晒《娛果》
http://fb.com/appledailyent