台灣有個靚仔小馬哥贏盡掌聲；中國都唔差，有個高高大大、幾有台型嘅薄熙來撐吓場。小馬哥公關技巧一流；身為國家商務部部長嘅薄熙來都唔弱，噚日佢喺世貿大會上，大讚東道主香港，上至交通環境、下至飯餸招呼，佢都讚不絕口。部長忽然兼職做咗香港旅遊大使，睇到個個眼都唔眨。

環境交通餸菜樣樣讚

薄熙來點解咁叻？當然可能同佢優良傳統有關，薄熙來係八老之一嘅薄一波個仔，正牌「太子黨」。不過，呢位太子黨與眾不同，識得應付海外媒體，作風比較開明，先管大連，再掌遼寧，然後上調中央，被視為政壇新星。有啲官重話，佢會係唔知幾多年後嘅總理接班人選㖭，所以真係不容忽視。
咁薄熙來推銷香港又掂唔掂呢？佢話世貿安排得好好，應該都冇錯，事關為咗佢哋呢班尊貴嘉賓，政府籌備咗成年，應該都唔差得去邊。至於話香港山青海綠、道路又乾淨，就睇吓邊區啦，佢出入嚟嚟去去都係灣仔同金鐘，有維港海景照住，有咁好嘅印象好合理。
講到冇塞車，真係好難駁佢，事關佢哋有警車開路，當局又封晒啲街道，點會塞車？如果佢閒日揸車過紅隧，可能別有一番體會。最後話飯菜一流，八方都唔會反對，不過，薄部長嚟香港招商都好多次，有乜未食過，今次點解特別好印象？
前晚有份參加晚宴嘅李華明都話啲餸菜真係幾正。雖然得幾道中國菜，例如拼盤、炸蝦、薑汁石班等，但味道認真唔錯。肥仔明重話席間有葉麗儀獻唱，又有中樂團伴奏，感覺非常良好，而且嘉賓入席時都收到一大包紀念品，有手表、有DVD。
讚完一大輪，薄熙來以八個字形容香港，就係「山青、海碧、乾淨、方便」，希望世貿成員喺呢個城市，做出「清醒」決斷；咁都俾佢引伸到。

為會場內搶番啲風頭

事實上如果唔係薄部長講吓香港有幾好，吸引傳媒注意，真係唔知有幾多香港人知道班部長猛人做緊乜。因為世貿會議場外日日㷫烚烚，示威人士招式層出不窮，人人都掛住睇佢哋重有乜嘢法寶，點會有人留意場內嘅動靜吖。
所以，薄熙來呢一招都好犀利，不但為自己爭取見報率，同時都為會場內嘅人搶回風頭，唔使俾示威者一枝獨秀，而且重畀足面特區政府，暗幫鬍鬚曾一把。就憑佢輕露呢一手，就見佢水準高，難怪行情看漲。


爆料熱線：29290000、27860099
報料傳真：26239278
報料電郵：[email protected]