業績期臨近，盈喜、盈警通告接踵而來，有實質業務支持嘅盈喜股，可以升到你唔信，好似內地環保龍頭光大國際（257）咁，報喜後股價繼續破頂，至今最多累升15%。如果能夠早着先鞭，率先買入潛在盈喜股，回報肯定更豐厚。主打內地中小企管理軟件嘅金蝶（268），絕對有機會成為盈喜分子之一，趁早上車有着數。

截至去年底止，金蝶全年虧蝕1.4億人仔，但如果將業績拆開上下半年睇，上半年錄得虧損2.1億人仔，意味下半年實賺7,000萬人仔。
由此推斷，中期業績發盈喜機會可謂高唱入雲。事實上，金蝶連續九年成為全國中小企應用軟件一哥，旗下力谷嘅雲端業務，推出兩年客戶已超過50萬人，冠絕同行；新近百度收購網龍（777）手機遊戲平台業務，令金蝶又多一個併購炒作概念。
睇圖表，金蝶起自5月嘅頭肩頂走勢，至6月底已完成量度跌幅，隨即出現雙底回升格局，噚日收報1.62元，升6.6%，以大陽燭兼大成交突破50日線，轉勢訊號明顯，倘有盈喜消息配合，今年高位1.83元，相信只係升浪嘅中途站。

唐牛