娛人劇場——藝人最愛煲的劇集
「𠵱家我追緊《凹/凸容醫》(NipTuck)第三季,雖然呢套劇好多整容場面,感覺有啲核突同驚嚇,但係因為知道佢做得好真,所以先有興趣睇佢點做,因為睇完之後自己都一定唔會去整容。其實呢齣劇亦都有好複雜嘅感情線。我最鍾意其中一位主角Dr.ChristianTroy,佢好有型。我都會煲到天昏地暗,最高紀錄一日睇足10幾集。」
「套《甜蜜間諜》劇嘅男主角好靚仔,佢拍過護膚廣告,劇情講佢去到韓國做間諜,完成一啲任務,後來鍾意咗個粗魯女警察,之後當然係發生一段愛情故事啦。套劇最吸引我睇嘅係一個樣貌平凡性格唔係賢良淑德嘅女仔,點樣同呢個型男喺埋一齊,令我好容易代入咗自己係個女仔嘅角色。」
「呢排我日以繼夜煲緊《宮》呢套韓劇,我一向都好鍾情韓國男人,今次呢套劇個男主角真係好型㗎,而且啲戲服又好靚。最重要係今次呢套劇有別於以往啲韓劇,起碼呢一套唔會集集啲人都喺度喊苦喊忽,有時都幾好笑㗎,同埋仲有好多宮廷內嘅鬥爭戲都好好睇。」
「我一直都好怕韓劇,劇情總係圍繞住喊同悲情劇種,例如之前播《天國的階梯》時,我見到演員喺度喊咪熄電視,點知轉頭開番仲未喊完。不過睇完《MyGirl》之後,完全改變對韓劇睇法,劇中韓星李多海、李東旭、李準基同朴詩妍以輕鬆手法去演繹愛情故事,令我有新鮮感覺,我覺得仲好睇過《浪漫滿屋》。」
「我平時好夜瞓,早排無意間睇咗一集《小寶與康熙》,之後就不停咁追劇。張衞健飾演嘅韋小寶好生鬼,佢喺對白加咗好多創意。其實我都好鍾意以前梁朝偉嘅版本,可能嗰時讀書時候追睇,印象會更深刻。若果有機會畀我飾演韋小寶都好,可以有七個老婆,不過最好唔使剃頭拍。TVB真係好醒,開拓咗深宵時段,等我哋呢啲以前睇唔到黃金時段嘅觀眾可以睇重播。」
「我之前拍攝明珠台《逃》(PrisonBreak)嘅宣傳片,好有興趣追落去,不過𠵱家只係睇咗兩集,但係已經覺得個古仔好吸引,而且佢喺美國嘅收視好好,所以一定有保證,加上自己好耐冇睇逃獄戲,喺監獄可以發生好多故事,而且佢仲會講吓兄弟情,戲味一定會好濃。我好欣賞幾位主角,特別係細佬Michael竟然為哥哥付出咁多,仲要紋晒身係身上,好大犧牲。」
「我近來第四次翻睇《戀愛世紀》,本身好鍾意松隆子,同埋我覺得呢套日劇真係好經典,總之成個感覺就好正啦。另外我覺得呢套劇對我最有意義嘅原因,係10年前第一次陪我睇呢套劇嘅人,到10年後佢都仲依然坐喺我身邊陪我一齊翻睇。」
「套劇分10輯,每輯12集,編劇喺每隔分半鐘就製造一個笑位,而且拍攝手法同演員嘅演技都好好,好值得我參考同學習,而且啲女仔好性感,唔開心嘅時候睇,個人都輕鬆番。我好鍾意裏面祖兒嘅角色,佢喺劇入面飾演演員,覺得佢低能得嚟好惹笑。」
採訪:駱華齡、馬建華、楊潔雯