黃依汶、周家蔚同莊思敏等噚晚喺灣仔君悅為《環亞美神大賽(香港)2018》擔任選美評判，首次做評判嘅黃依汶就話揀女仔好有難度：「如果選男士或者選BB我有經驗啲。」反而周家蔚就話自細鍾意睇靚女：「身邊朋友都好多靚女，睇靚嘢養眼啲。」咁將來會唔會幫囝囝揀女友？佢話：「咁又唔會，由佢自己揀，開心就得啦。」

中秋將至，兩位都話會同屋企BBQ慶祝，唔會出埠旅行，黃依汶話：「囝囝啱啱開學，要等佢適應吓校園生活，佢返得好開心，我送佢返學時，佢一支箭咁衝入學校，到接放學時就好似前世未見過媽咪一樣，好開心咁衝返嚟。」

另外，白雪婷獲選為冠軍、亞軍李安琪、季軍則係嚴昕童。現年23歲嘅白雪婷話係首次參加選美，覺得自己贏在笑容甜美，問到點解唔試參加港姐或亞姐？佢話：「因為過咗報名期。」現職Model同YouTuber嘅佢，曾跟湯怡合作護膚品廣告，未來有意入行，最想有機會同陳家樂及周潤發合作。

精選娛聞，喺晒《娛果》
http://fb.com/appledailyent