一連兩場紀念張耀榮嘅「演唱會之父榮耀紅館show」噚晚喺紅館舉行，葉蒨文就唱出《完全是你》，之後佢就用廣東話話：「其實好少人知，嚟香港第一個識嘅就係張生(張耀榮)，係佢請我嚟香港，好多謝佢，我咁多次演出佢都有份嚟，佢次次都要坐喺同一個位，我相信今晚佢都係同我哋一齊。」之後全場嘅觀眾就大笑，葉蒨文再話：「我哋都好掛住佢，我信呢啲嘢0架。」最後就送咗一首《福氣》畀耀榮叔。

喺播完羅文、哥哥張國榮同埋梅姐梅艷芳嘅MV片段之後，梁漢文同蘇永康就唱出《激光中》、《無心睡眠》同《夢伴》，梁漢文跳舞就太勁，連鈕都爆埋，對鞋都甩扣，佢話：「你睇下我幾落力，開晒我都唔知。」之後佢就立即返去後台整理。

蘇永康solo時就話：「張生係我好尊重嘅人，喺98年有個年輕人，唱咗13年歌都冇機會紅館演出，張生當時就話：『康仔，我俾個機會你好唔好？』當年12月，我就喺紅館開咗第一個個唱。呢首歌送畀你，每次唱呢首歌，都係想送畀你，《越吻越傷心》。」之後梁漢文唱出《七友》，話耀榮叔最鍾意呢首歌。


【壹錘佔中】8月31日5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral