國務院總理李克強到訪澳門，常批評政府的新澳門學社副理事長蘇嘉豪說，不期望中央出手解決澳門問題，認為應由澳門人自行管好。他又稱，近日有內地人士邀約他「溝通」，對他的監控亦明顯加強。

蘇指一直都被人監聽和跟蹤，但近日情況明顯惡化，直斥做法離譜，「我去普通私人活動又好，都有一啲擺明畀你知道嘅人望住你囉，希望我哋知道我哋被關注、被監視緊」。他稱「我冇期望佢(李克強)一嚟到就可以解決澳門問題，如要靠中央「大元」到訪先解決到，係唔健康嘅，制度上亦係唔應該」。他表示，不少澳門人以為澳門政府解決不了的問題，就能靠中央出手「打救」，其實應由澳門人管好自己地方。

另外，蘇說，政府封路以製造社會「安居樂業」的一面，令居民很反感。而所封路段是住宅區和主要幹道，「佢會去公屋同學校，呢啲都位於住宅區，封晒啲車位，市民已經怨聲載道囉。」

對於李明日會出席中葡經貿部長會議，蘇指會議出席人士是部長級，但中國派出首長級人士亦非首次，「反映中央係想用各種名目，令澳門喺一國兩制之下有個特定角色，包括做中國同葡語系國家之間嘅橋樑」。蘇續指，成為中葡橋樑和世界旅遊休閒城市是北京派給澳門的「硬任務」，中央派最高級官員來澳，是表示中央非常希望澳門可完成「硬任務」。