新界西醫院聯網即係有屯門、博愛同青山等醫院，噚日搞傳媒春茗，請傳媒去有幾十年歷史嘅元朗大榮華酒家食圍村菜。食神韜韜梁文韜做特別嘉賓，親自介紹圍村菜特色。佢話圍村菜同客家菜嘅分別，係圍村菜常用蝦醬、頭抽嘅醬料，仲會有魚；客家菜就冇魚，真係唔講都唔知。
雖然豬油好高膽固醇，但一眾嚟到大榮華，豈能不嚐嚐缽仔豬油撈飯？一缽甘香靚米加半匙豬油同些少頭抽，真係聞到已經流口水，連一向着重健康嘅醫生，都忍唔住大口大口咁食得暢快。
聯網總監盧志遠話，今年大計係要增加病床，希望藉此可以滿足到區內一眾市民嘅醫療需求。