有啲倉主鍾意自己騎上馬背親自仄馬，咁做又係咪真係會有好成績？阿棟無呢方面嘅統計，但成績就一定有好有壞。

今季跑咗三日馬，新倉主韋達最鍾意就係自己操馬教馬，結果就見到成效，日行一善仲要贏咗好難搞嘅處女馬，睇到佢既功力同底子都唔弱。

韋達從騎嗰陣，最弗時期都只係一班尾二班頂貨色，但可以做咗香港賽馬史上一個好重要嘅人，就係佢多馬揀，搶閘工夫同走位都拿揑得好好，淨講呢點，都已經比好多騎師都要好，咁先至成就到「十三少」呢個傳奇人物。

棄騎從練同樣得心應手，三兩下手腳已經成為開季大紅人，睇咗掛靴從練一樣可以闖出名堂。

今期（15日）第二場四班1650米泥地，丁冠豪馬房「鵰神」上季響容廐嗰陣，都知道呢匹馬唔係水貨，但搏極未贏咪轉吓環境，去咗丁廐唔係好耐就出賽，跑佢最擅長嘅泥地，贏馬唔奇，但贏到甩晒轆就真係估佢唔到，表現脫胎換骨。

依家仲係52分就着數到暈，今季一開波就揀番跑五場得一勝四位嘅泥地上陣，擺明有計，負磅唔算好重，熱熱哋都可以輕鬆贏番場。

第六場四班1200米草地，韋達馬房「特醒」，超級馬排10檔都冇有怕，響上手馬房炆牛腩都炆到入口即融，韋達做些少工夫就上得枱慢慢品嚐，又點會放軟手腳！

第七場四班1400米草地，「超能量」雖然實力未必好高，但都跑過七場位置，呢類難贏馬肯定會趁超級馬未上力時，早早就響季初搏命，韋達咁快就操好呢匹馬，入寶山點會空手回，此兩匹韋廐馬都值得捧場。

-------------------------------
參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港