呢位咁聽樞機話嘅婆婆,事後致電請教陳日君,可惜主教不在,為免令fans失望,據講有關方面急call製作人員回覆婆婆,講解煮呢味餸竅門畀婆婆聽,等佢有啖好食唔使心掛掛。八方要強調,樞機下廚有板有眼唔係地獄廚神,婆婆煮唔出上海紅燒肉,乃係因為八方報道煮餸步驟時太簡化所致,如果依足樞機指示,應該唔會失手。
八方班門弄斧,其實樞機紅燒肉喺教會內相當出名,可以話係名聞遐邇,冠絕筲箕灣,因為陳日君以前住筲箕灣,只要傳出佢下廚消息,其他教堂嘅人收到風就會自動報到。陳日君退休後多啲時間入廚房,教會中人有口福了。