今個夏天以破世界紀錄轉會費嘅2.22億歐元由巴塞隆拿轉會巴黎聖日耳門（PSG）嘅巴西國家隊隊長尼馬，登陸法甲之後有個好開始，喺三場聯賽射入三球之餘，仲交出三次助攻，堅係三三不盡呀！

法國傳媒就報道，尼馬自從轉會PSG之後，到依家都一直租緊酒店嘅套房住，不過當佢幫巴西踢完呢一輪世界盃外圍賽之後，情況就會改變，因為尼馬已經喺法國首都巴黎市郊嘅Bougival租咗一間有五層樓嘅豪宅俾自己同埋團隊嘅friend住。

尼馬今次睇中嘅豪宅，之前有法國影帝謝勒迪柏度（Gerard Depardieu）、即係拍過《大鼻子情聖》果位仁兄住過，呢間豪宅除咗有室內泳池、桑拿同埋土耳其浴呢啲「基本」設施之外，仲有個5,000平方米嘅花園，同埋一個波樓，啱晒尼馬開P用。報道話尼馬呢間新屋，月租係14,000歐元，即係成130,000港紙有多，不過以尼馬每個禮拜除稅後袋緊600,000歐元嚟講，濕濕碎喇！