周三港股跌得唔冤枉，因為當晚杜指亦跌82點，連10日線亦輕微跌穿。港股淡友昨日自然乘勢追擊，可惜日股做咗攔路虎，勁升258點收市，淡友午市被好友反咬一大啖，傷口重係被大白鯊所咬嘅size，期指高低波幅足足有250點。在期指挾倉帶動下，港股12月有個好開始，恒指升130點，收15068。
港股昨日正是典型的「單日轉向」走勢，兼且有大成交配合，趙飛雲同其他睇圖為主嘅人一樣，午市急急忙忙搵嘢買，結果在124.40元買多1200股滙控（005）及1.23元買入10萬股東航（670），買入兩股都係同一概念──追落後。

滙控將接力炒上

領導股中移動（941）昨已升破今年高位38.55元，高見39元，收38.90元。目前正向40元心理關口推進，較大阻力在42元水平。中移動累積升幅大，現價往績PE18.9倍，預測15.9倍，再升空間有限，港股要有大突破，還靠滙控、長和及地產股，地產股暫時受制於息口仍未到頂，而倉內已持有和黃（013），所以選擇加注滙控。
東航則是一早想買的股份，早前多次已提過。近日國航（753）升勢頗凌厲，東航相對升得少，所以買10萬股東航，完成整個航空股的投資組合。長遠而言，油價大趨勢向下，航空股前景漸轉佳。
恒地（012）昨再試34.10元低位反彈，原本亦想加注，但記起早前大摩所言，香港地產股通常要在息口見頂後，股價才會有較強上升動力，所以暫緩加注。
趙飛雲