噚晚係周杰倫《地表最強2》紅館騷尾場，請到天王劉德華做特別嘉賓，一齊唱經典歌《浪子心聲》及《忘情水》，現場歡呼聲不絕，周杰倫更喺華仔面前表演啤牌魔術，自言係有史以嚟最緊張：「好緊張喔！第一次變魔術這麼緊張！好奇怪。」華仔亦笑言自己都替周杰倫緊張。

一開始因病失聲嘅周杰倫盡力去唱廣東歌《浪子心聲》，令fans好感動，跟住劉德華就喺台下升上嚟，歌迷即尖叫聲，華仔七年未喺香港開個唱，去年初墜馬受傷後首度企上舞台表演，兩人一見面即熱情擁抱，周杰倫大叫：「終於請到你了！老實說我盼這天盼很久了。」

之後佢哋合唱《忘情水》，啲fans都有一齊唱，周杰倫就話：「哎啊！好感動的感覺！你們都很感動對不對？」華仔喺台上話想好似周杰倫咁喺舞台彈琴唱歌，周杰倫謙虛講：「不要不要，是我像你一樣，像你的十分之一就好了。」華仔就好奇問：「學我甚麼？」周杰倫擺出華仔招牌pose。

周杰倫曾為劉德華創作咗一首《一壺鄉愁》，2014年為慈善接受Ice Bucket Challenge，劉德華都點名「周杰倫」挑戰，可見二人有交情。周杰倫喺台上稱自己未出道嗰陣，喺吳宗憲嘅餐廳打工彈鋼琴，睇到華仔嚟，趕緊唱自己想寫俾華仔嗰首歌，仲請吳宗憲趕快請華仔聽一下呢首歌，不過唱完之後，華仔仲係食緊麵。聽完呢段往事，華仔解釋：「你知道我吃麵在想甚麼？我就想說這首歌真的太適合我！不過我的producer說這個不紅，我們找紅的人寫歌。」後嚟周杰倫出道後，又寫咗另外一首歌俾華仔唱，就係《一壺鄉愁》，華仔笑言嗰陣周杰倫紅咗，以前搵人寫歌都係咁，華仔大方解開當年嘅疑惑。

精選娛聞，喺晒《娛果》
http://fb.com/appledailyent