又有瑜伽中心結業，對於好似敏妮呢啲平日坐得太多嘅OL嚟講，玩瑜伽的確係好運動，但咁多瑜伽中心結業，咪話唔令人聽到都耍手擰頭。
講真，預繳式消費對消費者冇保障，所以有時寧願逐次畀錢，都唔好為咗細奀奀嘅折扣，而去買一大堆套票，但瑜伽中心又好似冇乜邊間提供按次收費。
同名家魏力、《報告王》高明傾開預繳式消費，拉拉扯扯講到大家讀書時都有幫人補習賺外快，但大家提供畀家長嘅補習費付款模式都唔同，魏力同高明提供月頭預繳，同月尾找數兩款，視乎「顧客」係邊個。
魏力話：「如果個學生係你親戚，咁咪焗住月尾先有得收囉！」敏妮就好均真，逐次收，無謂拖泥帶水、邊個欠邊個啦！
無啦啦講番咸豐年嘅嘢，原因係敏妮諗起，之前幫襯某fitnesscenter，喺會籍完結後，咁蹺敏妮個trainer辭職進修，佢就喺回復自由身後，私人幫幾位學生包括敏妮上堂，逐堂收錢，敏妮唔使預繳買trainingcourse套票，佢又可以賺外快，雙贏。