【新增動新聞】

巴塞隆拿雖然有新買返嚟嘅前鋒奧士文尼迪比利拉傷大腿肌肉，要唞成三、四個月至可以復出，最快都要踏入2018年至可以踢番波。不過，原來呢位法國國腳受傷，巴塞都唔係話無「得著」，因為佢哋今季至少可以慳番1,000萬歐元（約934萬港元）。

西班牙傳媒報道，奧士文尼迪比利當日以1.05億歐元由多蒙特過檔，合約係有幾項日後要畀附加費嘅條款，其中一項就係如果迪比利今季代表巴塞踢到50場波，巴塞就要科水1,000萬歐元。但係由於佢要唞幾個月，所以今季之內一定踢唔到50場，亦即係話巴塞唔使畀呢筆錢。不過，奧士文尼迪比利嘅合約入面係寫明今季之內踢到50場、抑或任何時候踢夠50場都要畀錢呢，呢層就唔清楚嘞！