日本經常會有好多幾無聊嘅選舉,不過,有時有幾有娛樂性,好似日本網站R25最近就進行咗一項調查,訪問咗200名20至30歲男性,叫佢哋選覺得「最難嫁得出嘅美女明星」,結果竟然由剛剛同男友伊勢谷友介分手嘅長澤正美稱冠。受訪男性講嘅理由好搞笑,有啲話覺得長澤生得太靚、有啲話佢生得太過高大!亦有人覺得佢性格太過奔放,唔似家庭形女性等等。
亞軍就係吉高由里子,吉高近年處於半引退狀態,有指佢因為失戀、長年合作嘅經理人辭退等等,令佢受打擊而精神狀態麻麻,所以唔接工作,啲受訪者都話佢性格太過飄忽、個性太強等。季軍亦都係現時冇得撈嘅能年玲奈,憑《海女》一劇走紅嘅佢,一走紅冇幾耐就同事務所鬧翻,因而被雪藏,所以啲受訪者都話佢好難觸摸、同自己唔夾、太過天然呆對住佢會覺得好攰等等。而第四嘅武井咲就被指一睇就覺得佢自尊心太強,第五嘅戶田惠梨香就被指性格比較難頂喎。
最難嫁得出女星排名:
1.長澤正美
2.吉高由里子
3.能年玲奈
4.武井咲
5.戶田惠梨香
6.佐佐木希
7.深田恭子
8.石原聰美
9.井上真央
10.川口春奈