唐唐敗選，唔見得好失落。佢朝早接受大班鄭經翰個數碼電台訪問，轉個頭走去同商台陳志雲食飯，花心呀！噚日下午，八方係銅鑼灣開平道，咁啱見到商台李慧玲，同一位疑似小儀嘅女子入咗daDomenico意大利餐廳食晏，睇真啲，原來係唐太郭妤淺嚟㗎。冇幾耐，商台CEO志雲大師同唐唐都入埋去，唔通又係「志雲飯局」？

呢餐飯又開紅酒又開白酒，食足兩粒鐘。兩點九終於見到唐唐同太太出來，兩個都飲到面紅紅，唐唐好俏皮咁問：「點解你哋知我喺度㗎？」話自己只係同朋友食飯敍舊，唔係傾訪問。不過敍舊都要前後腳走？志雲大師同李慧玲15分鐘之後出來，不過塊面就完全唔紅。
唐生唐太就飲到臉紅紅，喺九龍塘約道嘅「唐宮」僭建地牢明顯未拆。八方同事路過，見到唐家大閘突然打開，只見唐唐阿仔唐嘉盛換咗髮型，剪個潮爆光頭，開住部保時捷銀色跑車離開大宅，睇嚟神情輕鬆。唐唐鄰居約道三號大宅，早前由拍賣行放盤，近日換咗獨家放盤告示板。地產代理冼先生話，業主叫價3.98億元，有幾位內地客有興趣購入自住，與唐宮為鄰。