王英偉2015年底由地產建築業轉行兼過大海，幫金沙老闆Sheldon Adelson打工，問佢呢一年有冇學識些少賭術，佢即刻耍手擰頭，又講笑話「我管理酒店，都唔會落去執房喇」，咁有冇落去賭場八卦吓日日贏錢嘅女賭神係何方神聖呢？點知佢話冇，仲好輕鬆咁話「賭客當然有輸有贏」。
佢指，只係咁啱上一季有位賭客贏得多，賭場贏得人錢，都要俾人贏，只要賭客正常賭錢就可以，賭場亦唔會因此加強防範措施咁話，真係好有風度咁喎。
講番香港特首選舉，王英偉係文化界選委，見佢一路都冇為任何一名參選人站台，原來係因為佢七十年代港大畢業後，加入政府做政務官接近廿年，同林鄭月娥、曾俊華、葉劉淑儀都係朋友，為免順得哥情失嫂意，惟有唔公開表態。文化界選委稍後會輪流約見參選人，佢到時就會有心水㗎喇，佢個人就唔屬意綑綁投票嘞。
李華華
mailto:
[email protected]