嚟緊星期三（6日）晚快活谷跑九場，角逐四關國際騎師錦標賽嘅騎師，可以喺其餘非騎師賽場次上陣。

好似5班1650米就有新配搭，雷神莫雷拉師弟、首次來港參賽嘅巴西18歲新星韓偉傑，獲沈集成關照，提供「馬主精選」上陣。而近兩屆都有馬贏嘅日本好手戶崎圭太，被鄭俊偉睇中，將會策騎「升力」，在同組鬥「馬主精選」，夠晒新鮮。

國際騎師錦標賽高手如雲，平時座騎數唔多嘅騎師難免受到影響，小將吳嘉晉有少少尷尬話，當晚仍然未book到任何賽駒，好可能要坐冷板凳。好多時嘉晉嘅座騎都係下風馬，但身為騎師，梗係想出賽上陣，力爭表現。