港股升開就升，恒指又創出今年新高，收市22384，升184點，成交又轉活，有741億元，上升正股保持600多隻，股仔陸續開車，上升層面會一路擴散。
第一視頻（082）又一鳴驚人，反覆整固個多月後，一日就幾乎收復「失」地，全日由頭搶到尾，仲高收1.82元，大升0.22元，升幅13.7%，成交2.15億股，交投夠晒「墟冚」。
8月底，推介第一視頻，當時股價只係1.11元，只係半個月，已升到1.94元，升幅74%，之後唞咗成個月，噚日一棍，又抽上去，MACD好快出現「雙牛」入貨訊號，確認開展新升浪，目標指向2.50元。
國際資源（1051）個金礦嘅「身家」越來越豐厚，一來金價大升，二來最新公佈嘅礦石蘊藏量，即實際可供開採嘅礦藏數據，黃金由原本222萬盎斯，大幅提升27.5萬盎斯（約12%）至249萬盎斯；白銀由2971萬盎斯提升270萬盎斯（約9%）至3241萬盎斯。
黃金蘊藏量增加12%，「身家」即係幾多？以每盎斯齊頭1000美元計，總值係2.75億美元，此額外增值之數，已超越集團收購金礦項目嘅代價2.21億美元，仲未計白銀增值之數。

繼續物色優質金礦

國際資源目標係要成為以亞洲為基地的跨國黃金生產商，現時Martabe項目建設正進行得如火如荼，預計2011年初可以投產，每年產量初步為25萬盎斯。另一方面，公司亦正物色其他優質的金礦項目，除可提供即時盈利貢獻，更可增加產量，目標是3年內年產能提升至50萬盎斯，5年內達100萬盎斯。
國際資源股價在0.42元至0.50元間橫行已兩個月，近日有轉強之勢，一破位而上，初步上升目標係8月初的高位0.71元。大行多看好國際資源前景，評級「買入」，澳洲環球金融公司Stonebridge上周發表的目標價為0.70元，大摩0.78元，大華繼顯的12個月目標價由0.77元到1.30元。
郭兆誠