【米雪苗僑偉愛駒】熱倒後換人再戰!杜美爾:唔擔心末段會力弱
蟲草之星勝利歡星Aldo米雪苗僑偉杜美爾
谷草今晚(26日)八場賽事,潘頓共出七場。第五場三班1200米冇馬騎,呢場大摩隻「勝利歡星」上仗由潘頓出戰田草1200米獲得亞軍,今晚渡江卻換上Aldo杜美爾。
原來潘頓今場一早卜咗另一匹座騎,但該駒最終冇報名,同時大摩亦已落實「勝利歡星」由杜美爾壓陣,結果潘頓只做座上客。
「勝利歡星」歷季谷草11戰全落第,今場10檔真係考杜美爾騎功,呢位南非好手今期抽籤運麻麻,除「英明神駒」好少少排4檔起步,其餘四匹座騎都抽到中外檔,包括最尾第八場三班1650米,米雪、苗僑偉嘅團體馬「蟲草之星」(11檔)。
「蟲草之星」上場喺梁家俊胯下初戰谷草,原本守到內欄靚位,但對面直路上失位,一度墮到馬群後列, 末段重新加速時卻重重圍困,2.9倍大熱最終只得第五名,際遇認真差。
今場「蟲草之星」換上杜美爾有心拼過明白,但檔位由2檔變成11檔,Aldo當然唔太滿意,但佢話「蟲草之星」之前試過喺田草排外檔放頭,末段都唔斷,包括今年2月蘇兆輝贏馬一役,由10檔切入內欄一放到底,所以今場排外檔未必係壞事,唔擔心末段會力弱,關鍵在出閘後夠唔夠快切入搶位。
Aldo上月起在港港策騎,短短個半月已經拎到8場頭馬,更以騎後上馬出色見稱,今回有「勝利歡星」同「蟲草之星」兩匹前置型賽駒上陣,即管睇睇佢嘅領放本領係咪一樣咁勁。
-----------------------------
7月4日起 《蘋果動新聞》只限升級壹會員閱覽
繼續撐蘋果!