共收20份申請
蘋果基金愛心基金委員會最快會喺呢個月底開會,審批第一季提交申請資助嘅服務計劃,今季我哋收到二十份申請,基金幹事現正密鑼緊鼓做緊跟進工作,待開會後我哋會喺下個月內以書面通知各申請單位,至於成功攞到撥款嘅計劃,我哋一定會第一時間通知各位,好令新服務快啲走入社群,服務人群。
今次未及提交申請撥款嘅機構,可別忘了我哋一年四季接受申請嘅「約會」,下次開會喺六月,記得喺五月就要準備好計劃書寄嚟,第三季同第四季嘅開會時間喺九月同十二月。
我哋唔怕申請書愈嚟愈多,最多咪多啲嚟密啲手,尤其喺𠵱家咁嘅經濟環境,我哋基金對社會有一份承擔。只要你哋有切合社會急速轉變需要嘅好計劃,亦即係睇到啲人好有需要,但又冇其他資源可以幫到佢哋,可以搵我哋傾傾,等我哋共同為社會美好明天出一分力。