【楊洛婷好擔憂】岳父接受換心手術 Tim:佢已經可自己透氣
楊洛婷加拿大Dear Jane換心手術
楊洛婷今年9月為老公樂隊Dear Jane主音歌手黃天翱(Tim)誕下女兒Tanya,啱啱過去嘅聖誕節,楊洛婷就帶住Tanya返加拿大探望家人,順便過白色聖誕。
呢個溫馨聖誕之後,楊洛婷喺ig為佢爸爸集氣,原來楊爸爸啱啱接受咗手術,現時都未醒番,佢留言話:「噚日發生咗件奇蹟。我爸爸再次接受心臟移植、腎臟移植,12鐘頭手術後成功。我哋好感恩,呢次手術要搵到合適嘅器官好困難,同時我哋都好擔憂,因為爸爸現時未甦醒,亦唔知佢嘅康復進度。」楊洛婷保持正面態度,話現時會為爸爸祈禱,最希望係新一年有新開始,等爸爸醒咗之後可以同寶貝孫女一齊玩。
老婆同囡囡喺加拿大為岳父集氣,阿Tim就因為要出席各大頒獎禮而留港工作,噚晚Dear Jane嘅成績亦十分理想,共奪得「勁爆樂隊」及以歌曲《也許我不會活多一歲》奪得「勁爆編曲」。頒獎禮後,Tim接受傳媒訪問,提到岳父情況,佢話:「太太有傳message俾我,話岳父情況好好,好好彩囉,可以換到心臟同腎,兩樣一齊做到,個心同腎都能對應到佢嘅身體,係一個miracle(奇蹟),個手術好順利。(岳父醒未?)醫生話術後要一段時間,太太話岳父已可自己透氣,康復得好快,(精神上支持太太?)係,太太本身係一個好緊張嘅人,日日都會聯絡,知佢有一日半冇瞓覺,今(噚)日可以帶BB過去見吓公公,公公又有好消息,係值得開心嘅,自己就要完晒手頭上工作,下個月先可以過去。」
【minigame】2017瘋暈人物 返工打機唔使擇日
http://bit.ly/2CeWQkP
更多娛聞,喺晒《娛果》
http://fb.com/appledailyent
樂隊Dear Jane主音歌手黃天翱(Tim)指岳父情況理想。
楊洛婷同女兒Tanya,喺醫院為手術後嘅爸爸打氣。(ig圖片)
楊洛婷喺ig撰文,話好感恩爸爸手術成功,希望新一年爸爸可以同孫女享天倫樂。(ig圖片)