立法會秘書處為咗方便立法會議員開會，平日開大會嘅日子，都為議員安排午餐同茶點，有需要時亦會為議員安排晚餐，有關費用由議員共同分擔。若果食唔晒，會點處理？公民黨立法會議員陳家洛好關注呢個問題，向立法會秘書處查詢最近三年嘅廚餘數量。

結果顯示，立法會過去兩年，每年都有超過700公斤廚餘，即係有成超過140包5公斤大米嘅重量，聽落都咪話唔浪費！

之但係立法會秘書處就補充，2013年起秘書處都會將剩餘食物捐贈予註冊慈善團體「膳心連」，轉送有需要人士，過去3個立法會會期捐贈畀「膳心連」嘅食物重量，2013至14年有761.3公斤，2014至15年度有730.5公斤，2015年10月至2016年2月則有312.5公斤。