羅康瑞做唔到政協常委有傳聞 - 李八方

蘋果日報 2003/03/14 00:00


全國政協噚日完成第十屆分餅仔大會,一切都在掌握之中,全無驚喜。霍英東繼續做政協副主席,至於各大財團,亦有人做政協常委,包括吳光正、郭炳湘同埋李澤鉅。

行會代梁振英澄清
梁振英同多位新貴一入政協就有常委做,恨死隔籬。八方問佢有乜感受,振英哥好認真咁話,自己第一次正式參加國家大事,氣氛好好,秘書處效率好高。
梁振英雖然人在北京,但係有報道指佢同阿松一樣偷步買車,佢對此耿耿於懷,叫行會發言人澄清,架車係公司去年底購入嘅,佢乜都唔知,包括唔知阿松加稅。
反觀上海姑爺羅康瑞,佢喺國內咁多投資,又咁早入政協,最後都冇得更上一層樓。陳永棋話羅康瑞早前已經做咗全國工商聯副主席,地位比政協常委高,所以毋須爭做常委喎。但係點解釋伍淑清兩樣都有份呢?有高人就話,阻力可能嚟自政協高層。羅生自從變番單身後好多傳聞,總之盡在不言中,佢自己應該心知肚明喎。



傳真︰2623-9278
電郵︰[email protected]