下月先至到中秋節，餅店已經急不及待推售月餅，近年流行嘅冰皮月餅越出越刁鑽，美心集團今年首次推出連專用保冷袋嘅別注版冰皮月餅搶攻潮人。美心產品經理陳穎詩Angela話，冰皮月餅好啱年輕人口味，美心今次一口氣推出南華、Kelly、天使魔鬼、港式系列等四款別注版冰皮月餅套裝。
好似南華冰皮月餅套裝，個袋用咗南華嘅「波南」公仔做主角；月餅有朱古力、芒果同紅豆甘粟三款口味，「全新口味嘅紅豆甘粟，係配合南華球隊紅色主調，紅豆紅豆，即係南華球員雄赳赳嘅意思。套裝仲有南華球員陳七（陳肇麒）等做封面嘅別注版八達通卡套」。

陳七　陳慧琳成賣點

Angela話，除咗陳七月餅，仲有藝人陳慧琳嘅Kelly冰皮月餅，最大賣點有個Kelly卡通肖像嘅保冷袋。天使魔鬼套裝嘅賣點，就係一次過品嚐白朱古力嘅天使脆脆，同黑朱古力嘅魔鬼脆脆兩種口味。港式系列套裝會喺月中舉行嘅美食博覽銷售。除南華月餅套裝六折賣$78，其他五五折賣$70。
榮華餅家都推出全新裝潢嘅冰皮月餅，傳訊經理胡小寶Elizabeth話，雪燕繽紛罐裝冰皮月餅，口味分別有野生蜂蜜燕窩蔓越莓豆蓉、芒果綠豆蓉等9款；雪燕派對罐裝有五款口味燕窩月餅，「喺美食博覽會大減價賣月餅，冰皮月餅以五五折發售，傳統嘅雙黃白蓮蓉月餅五三折」。

電郵：mailto:[email protected]