岳少系內股份，一年嚟冇大升過，遲早實大炒一鑊。「麗」字頭當中，要煲麗國（191）。麗國最新NAV1.94元，計埋嚟自麗豐NAV增值，麗國NAV上到2.5元，現價（0.68元）折讓高達72%，係麗新系折讓最大嘅股份。再講，呢期外資欽點長實（001）、恒地（012）等大價港資地產股，炒賣理由之一，就係NAV折讓。麗國有咁吸引嘅折讓，資金上而下，遲早掘到麗國。
又麗國最新市值得11億銀，掌舵岳少又揸重飛，hold咗麗國37%。麗國市值要膨脹，岳少家底先水漲船高。麗國除咗繼續做控股旗艦，有冇新業務搞作，令到市值好似世城（355）咁暴漲兩三倍，又係憧憬所在。先當炒折讓，麗國NAV折讓收窄到50%，都要升84%到1.25元，麗國翻一番到1.36元，NAV折讓仲講緊45%，仲有大把收窄空間。

寰宇瓣瓣靚爆鏡

寰宇（1046）07年度中期純利搶升4倍到1921萬銀，就算扣除非經營溢利，純利都大升兩倍。集團拓展電視連續劇，加埋祖國強勁需求，至係增長關鍵。就當寰宇07年度純利增長只得兩成，到3270萬銀，PE都落番9倍單位數。寰宇有ChinaConcept，呢個PE水位，肯定唔貴。
寰宇每股淨現金近0.1元，係現價（0.189元）53%，財政弗到爆。年頭以嚟，周線圖整咗支好靚嘅上升旗，一破旗形頂0.21元，直指0.35元，升幅85%。數據圖表瓣瓣靚爆鏡，破位前要撲貨。
錢雋