特首林鄭月娥今日現身沙田馬場，為馬季主持開鑼後，即喺Facebook發文兼上載輯錄過往入馬場敲鑼短片，話今年已經係連續第7年為馬季主持開鑼，所以佢都同馬會董事兼行政會議成員廖長江講，自己係敲銅鑼嘅「熟手技工」。娥特跟住「嚟料」，話上屆政府嘅5年間，傳統上呢個由特首出席嘅活動，「因為種種原因」，都由時任政務司司長嘅佢代勞，繼而指由特首親自頒發「香港特區行政長官盃」，應該係比較親切嘅。

究竟前特首689因為乜嘢「種種原因」要由娥特代勞？有心水清的網民就留言話：「犯眾憎嘅特首係唔敢出席馬會，因為全場馬迷會狂噓」。事實上689自從2012年首度以特首身份到沙田馬場為香港國際賽事任嘉賓，遭全場馬迷噓聲「招呼」，甚至有人倒豎拇指兼大叫「吔蕉」後，從此絕跡賽馬日主持開鑼儀式。2016年689老婆梁唐青儀試過為特首盃頒獎禮頒獎，亦遭馬迷柴台，向佢大聲嗌「龍蝦」，場面尷尬。所以話為馬季主持開鑼同頒獎，民望差嘅都無謂獻醜嘞！