苑瓊丹今日喺柴灣拍攝更年期食品廣告，佢以一頭髮捲加睡袍、一副包租婆look上陣，仲搞笑地擺出唔同姿態兼曬腿。

苑仔今次以幾個唔同造型拍廣告，佢笑言：「又要揸雞毛掃、又要揸刀、差在未揸鑊鏟，呢個年代工作同拍攝，簽名會同見面會都好，都要做多重功夫。」至於酬勞會唔會相對提升？佢就話：「呢啲基本包裝，我都唔知，傾完啱就做，有自我宣傳價值好緊要，人哋見到我由咁醜變到咁靚，可塑性咁高，靚同醜都搵我做，真係無敵。」

賺錢賺到盡，苑仔話：「又唔可以賺晒，自己體力支持唔住，要開始保養。」今次接拍更年期產品廣告，毫無畏懼，苑仔話：「又唔係性病，性病就驚，正常生理問題，五十幾歲左右女士有更年期，一啲都唔奇怪，如果冇就要拎去研究，但我好好彩，更年期時候一啲困擾都冇，謝天謝地，可能同我保養健康有關，我會針灸、放血、睇中醫、食保健產品，覺得自己個人係一副機器，要保養，所以經歷更年期人哋話脾氣大，咁我不嬲都咁大所以唔覺。」

更年期後係咪收咗火？苑仔話：「應該咁講，我對工作有要求會出聲，更年期嘅時候都係咁，人哋唔會覺得有變化，而且個樣都係咁靚。」對住老公脾氣會唔會溫柔啲呢？苑仔好sweet咁話：「我老公咁就我，我梗係要發下佢脾氣啦，大家咁上下年紀咁相處先開心，如果佢唔畀我做乜做乜，我真係一槌打爆佢，要互相尊重，做私家偵探好辛苦，奉勸港女對愛情要互相信任同扶持，咁先美滿。」

精選娛聞，喺晒《娛果》
http://fb.com/appledailyent