理工大學上年爆發「連儂牆」風波，幾名學生代表因闖入大學高層辦公室要求對話引致衝突，其中有人被罰停學甚至即時退學兼永不取錄，罪名包括鬧爆時任暫任副校長（學生）沈岐平同埋學務長莫志明，話佢哋「收共產黨錢收得咁過癮，舐共舐得你哋咁開心呀啦，屎忽鬼」，令二人感被冒犯，對大學聲譽造成負面影響，誹謗罪名成立。鬧人「屎忽鬼、舐共」係咪真係誹謗呢？八方相信自有公論，大家心中有數，但幾年前原來喺莊嚴嘅立法會內，有市民大鬧一班硬sell特首普選方案嘅高官「屎忽鬼、舐共」，仲要加多句垃圾，結果唔使即時出場，更加唔使被罰永遠不准進入立法會。

翻查資料，2015年5月，立法會舉行政改公聽會，大批年青人「自創」寸爆政府、建制派嘅搞鬼組織名出席會議，包括「政改奸人組異靈一柒一定死得大聯盟」、「保障垃圾桶沉默權利關注組」、「學生瞓醒左腳抽筋變左膠症後群青年關注總會暨一朝修你皮帶扣工業聯會」等，其中一個代表「愛港之子否決譚耀宗大聯盟」嘅少女王詩詠，一開始就鬧主持會議嘅譚耀宗，之前話佢哋個組織名唔夠莊重，不過王繼續可以出席發言。

少女跟住狠批一班高官坐巴士「落區」，揮下手就算，政改三人組「帶領香港人向住中共狗進發」，更爆seed話「衷心想講一句，你哋班屎忽鬼高官慳啲啦！」譚Sir有咩反應呢？佢只係好淡然咁話「唔可以講啲粗俗嘅說話」，畀佢繼續發言。少女又慨嘆政府唔聽民意、唔聽年輕人心聲，「成日都話年輕人係香港未來社會嘅棟樑，呢一句簡直難聽過粗口……上一代有冇為我哋爭取更公平公義嘅社會？」最後佢仲鬧高官「垃圾」，「你哋呢班人竟然為咗舐共上演一場真高官偽落區一票做特首嘅真人騷」，叫高官重啟五步曲，真正聽下民意。譚Sir一直畀佢講，冇話趕出會議室、熄咪，同理大一啲高層相比之下，幾咁寬宏大量。

其實「屎忽鬼」喺80、90年代比較多人講，周不時仲會出現喺電影度，八方記得，《旺角卡門》中張學友飾演嘅「烏蠅」就講過至少2次，戲入面主要用嚟鬧人做事鬼鬼祟祟、乞人憎，冇咩其他特別意思。呢個形容詞依家比較少人講，真係估唔到仲有學生會用呢個old-school嘅形容詞啊！

相關新聞：理大判決書曝光 學生斥副校舐共「屎忽鬼」誹謗入罪（附當日長版本片段）

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb