噚日港股大跌市成為電視頭條新聞，相信今日見報亦會成為多份報章頭條。港股收市後外圍股市暴跌，今次跌市真係唔知點收科。全球股市大跌，以往中國股市所受影響會較細，但今次中國股市已唔能夠置身事外，深圳同上海A股都跌超過5%。

內地股市暴挫，唔計外圍因素，其中一個負面消息，係中國平安保險（2318）突然宣佈配售A股兼發債，集資資金約1600億元。以保費收入計為中國第二大保險公司嘅平保，計劃配售不超過12億股A股，或佔現有股本73億4510萬股的16.3%。此外，平保還打算申請發行412億元人民幣的可換股債券，可以兌換成A股。
連同已獲批准回歸國內發行A股的中煤能源（1898），擬發行不超過15.2億股A股，集資超過357億元，兩隻股份已抽走市場資金1900多億元，去年市況大旺時，呢啲集資可能影響未算大，不過今時今日，國內貨幣政策已經從緊，再加兩隻股份大規模集資，對A股就會有好大影響。
平保是次集資最令市場震撼之處，係該公司一向並無資金壓力，何以突然大舉集資？據通告講，資金或用作為投資項目的資金，不過收購的條件就只泛指需「符合集團於保險、銀行及資產管理行業的核心業務；及對集團擴展策略及營運效率有重大利益」，並沒有對收購對象露端倪。內地報章估計，平保或作海外收購，係咪可以視作好消息，以現今氣氛，或變壞消息都未定。

全球跌市之下，高息股早輪曾經成為市場嘅資金避難所，例如領匯（823）噚日朝曾作勢破頂創52周新高，惟其後都要跟隨大市下跌。據股權變動資料顯示，富蘭克林申報於1月15日減持525.9萬股領匯，每股平均價為19.47元，套現1.02億元。乜領匯唔係資金避難所咩？如果繼續有基金沽售呢啲高息REITs，睇嚟投資市場最安全嘅地方，係揸現金。