由陳惠敏擔任總監製嘅星輝娛樂國際集團有限公司，今晚喺紅嘉里酒店舉行群星晚宴，陳惠敏、錢小豪、呂珊、李司棋、斑斑、吳志雄、梁焯滿、丁羽等都有到場。

即將於下月結婚嘅韋家雄及未婚妻Keynes，今晚就手拖手現身，非常煙靭，下月6號就係佢哋嘅大日子，被問到進入倒數階段，佢哋話：「仲有一個禮拜，自己都諗唔到，越嚟越緊張。之前話俾大家聽準備得七七八八，o依家已經係八八九九。」問韋家雄準備好《愛的宣言》未？佢話：「未知呀，都係太太嗰邊寫嘅，但驚自己到時會緊張到喊。（乜你咁眼淺㗎咩？）一緊張就會咁樣。」

再問到佢同班兄弟開會未？韋家雄話：「未呀，估唔到搞結婚真係咁忙，都未有時間。」班兄弟分工合作未？韋家雄笑道：「佢哋個個都冇得頂！非常冇得頂！都預咗班姊妹都係玩自己。」咁你飲唔飲得？韋家雄話：「都飲得嘅，但係會醉囉！」怕唔怕太太啲晚裝會性感？佢話：「都冇得防，點禁吖？晚裝都係咁樣，盡量叫佢凸少啲嘢出嚟啦！」準韋太Keynes聞言喺側邊哈哈大笑。

韋家雄透露婚後會先到泰國探親，因為太太啲親戚喺當地，之後太太話想去日本同台灣食嘢，到時睇吓有冇時間去埋呢兩個地方。韋家雄仲話會放假放到下月22號，因為結完婚都要有時間唞一唞去玩吓行吓。

精選娛聞，喺晒《娛果》
http://fb.com/appledailyent