前日最𢱑頭嘅波,梗係英甲強隊米禾爾竟然主場淨吞下游分子洛達咸六蛋,聽佢哋嘅領隊麥基話係班球員因不滿凍薪,所以先至踢成咁。
ITV冧咗,搞到好多英甲球會喺財政上出現問題,而米禾爾亦唔例外,要凍結球員人工;連麥基都唔認為係技不如人,只不過係球員唔盡力。麥基咁樣話:「我好質疑點解啲球員踢成咁。如果佢哋覺得經已盡晒力,咁樣睇我哋應該要換血!」其實米禾爾班球員經已好幸運,只係凍薪而唔使減人工;所以如果個別球員真係好似麥基咁講特登玩嘢累球隊輸波,真係抵炒魷。
另外,由於啲超聯球會冇錢買人,所以三支超聯降班隊葉士域治、打比郡同李斯特城,都幾乎可以原班人馬比賽。佢哋有超聯球員壓陣,喺英甲超晒班,演出亦對辦,下屆應該好有機會返超聯。
德甲賽會阻資訊自由
讀者或者會問德甲都開番,但係點解連一張比賽相都冇。事關德甲聯賽會要各通訊社簽下同意書,唔可以將啲比賽相用喺其他刊物同互聯網度;不過,啲通訊社唔制,所以咪冇得入場影囉。話晒呢個世界有資訊自由,所以德甲聯賽會咁做,真係好唔合理。