韓劇《HotelKing》男星李東旭靚仔又有風度，而且演技又好，向來都得到唔少女士歡心，不過奇怪嘅係，李東旭一直都好少同人傳緋聞，令大家都好好奇佢嘅感情生活。

而喺噚晚播出嘅《Roommate》入面，擔任節目嘉賓嘅李東旭親生妹妹就喺節目上面驚爆李東旭嘅前女友，即時惹起關注。

節目上，男星趙世浩就問李東旭妹妹有冇見過李東旭拍拖，之後李東旭妹妹就爆話：「有見過佢女朋友，而且仲一齊食過飯。」李妹妹仲話自己冇將哥哥個女朋友當成明星咁睇，只係當成哥哥普通女朋友咁食飯。之後趙世浩仲問李妹妹女事主係唔係歌手時，李妹妹就話：「嗰時仲未係歌手嚟o架，真係好靚。」妹妹誠實嘅對答，令李東旭無奈咁不停傻笑。

講到李東旭，佢同女星申世京合作嘅新劇《鋼鐵人》喺今個月10日就會首播，而今日劇組就公開咗劇集海報，海報上李東旭成個背脊都生晒刀，而企喺佢身後面嘅申世京就不顧危險咁走近佢，令人好奇兩人喺劇中嘅感情發展。