當年今日
關於我們

馮仁昭四圍超:《雪狼湖》變臉內地重演

蘋果日報 2002/01/22 00:00


馮仁昭八到當年張學友孭飛嘅音樂劇《雪狼湖》,五年後重出江湖,不過就唔係喺香港做,而係喺內地。聽講搞手陳淑芬已經開始籌備《雪狼湖》國語版,除咗張學友之外,其他角色嘅演員都未定。

內地演員優先
搞手陳淑芬日前話,《雪狼湖》用番原班人馬好似林憶蓮、陳松伶演出嘅機會就唔大,而由於今次會以國語演出,所以角色人選會優先考慮內地演員。
馮仁昭聽聞女主角有可能係內地一間演藝學院嘅學生陳奇,佢個樣生得幾甜,重能歌善舞,聽講佢做女主角嘅呼聲都幾高。問番陳淑芬,佢都話對呢個女仔有印象,不過𠵱家有好多人向佢推薦,可以慢慢揀,所以唔會咁快落實。事關𠵱家只係好初步,陳淑芬話等人寫好個《雪狼湖》國語版嘅劇本先真正開工。

鞏俐酒店會電影人謀復出
鞏俐噚日下晝,同兩個朋友喺港島香格里拉酒店咖啡室歎下午茶,其中一個係《臥虎藏龍》嘅老闆江志強,唔知佢哋係咪傾拍新戲呢?
鞏俐戴住墨鏡,好輕鬆咁同人傾偈,即使成班記者圍住影相,佢只係望一望鏡頭笑一笑,然後繼續傾偈,都幾有巨星風範。
田蕊妮為胞兄求助劉慧卿
田蕊妮嘅哥哥先前俾警察按地截查,之後佢阿哥投訴話警方粗暴對待佢。田蕊妮為咗呢件事已經搵咗立法會議員劉慧卿幫手,佢噚日返亞視開工嗰陣話:「劉慧卿畀咗電話我哥哥,話有問題可以隨時搵佢,我哥哥𠵱家見到差佬都會窒一窒,我勸佢睇心理醫生,佢又唔想去,唉!」

趙金卿、吳啟華不甘被屈
噚日有本周刊話吳啟華終於承認同趙金卿Cathy拍拖,馮仁昭拿拿臨搵兩個當事人問個究竟,佢哋異口同聲都話好鬼嬲,啟華話第一時間同女友金巧巧呻之外,重即刻搵律師採取行動。
而Cathy反應重大,嬲到連會都開唔到。佢話根本唔識吳啟華呢個人,連佢啲劇都未睇過,何來會同佢拍拖咁話,Cathy話俾本周刊咁屈法,一定會告到底。

陳司翰閃縮食粥
陳司翰(Victor)同周永恆(Roy)老友鬼鬼,前晚佢哋同兩個圈外朋友,喺跑馬地頂好粥麵食消夜。Victor一見記者即刻閃開,不停掩面咁話:「我唔想影相呀,有乜好影呀?」好似俾人踢爆戀情咁,非常搞笑。
佢哋四個人醫完肚就由阿Roy請客,問阿Roy幾錢找數,佢話:「百幾蚊啫,呢啲粥仔。」