電音節噚日喺西九文化區苗圃公園舉行，其間有4人昏迷送院，結果1人不幸死亡，警方喺現場搜到小量毒品，正追查死因及命危者驗尿結果。

呢個號稱世界級戶外電子音樂節「Road To Ultra」，有「世界百大DJ排行榜」第三名嘅DJ Hardwell坐陣，吸引連詩雅（Shiga）、王宗堯舊愛黎紀君、人妻周家蔚、梁靖琪（Toby）、莊思敏朝聖。

噚日朝七點幾已經出動參加跑步嘅Shiga，下午四幾點幾約埋黎紀君去到現場，佢哋喺普通門票區現身，著露腰小背心襯熱褲騷長腿嘅Shiga，到場即刻玩自拍打卡，遇到幾個女仔朋友又齊齊影相自拍。

Shiga雖然著到咁行，但都係冇仔埋身，全程都係同黎紀君咬耳仔傾偈，有時就玩下手機，好似悶悶不樂咁，玩得唔係好放。直至夜晚7點3，最出名嘅DJ Hardwell出場，Shiga終於開始high，全程好投入跳舞扭身，仲跳咗半粒鐘。

人妻周家蔚就同好姐妹梁靖琪（Toby）等成班男女朋友嚟玩，佢哋都係喺普通門票位，兩個都有飲住啤酒聽歌，露背紥髻性感上陣嘅Toby，仲好似公關上身不停撩朋友傾偈，周家蔚就全程影相玩電話，冇乜點跳舞，DJ Hardwell出場時，佢哋都high到企身睇騷，但周家蔚企咗3、4個字後，唔知係咪現場天氣熱嘅關係，佢冇耐就坐番喺草地同朋友傾偈，反而Toby滿場飛同朋友吹水，可能喺公眾場所關係，佢哋蒲得嚟都好有自制能力，一杯啤酒飲好耐，周家蔚仲咬住啤酒膠杯玩手機㖭。

而莊思敏就喺VIP位區現身，有梳化有包廂有香檳，雖然有7、8個朋友喺度，但全程卻只有莊思敏跳孤獨舞，隔籬嘅男友人企咗喺度，見莊思敏跳舞都冇理，難得莊思敏全程自high，不停手舞足蹈喪扭腰，跳到悶就攞手機拍片影現場。

之後莊思敏再跳咗幾個字冇人埋，惟有自己坐低，其後朋友都出晒前台睇DJ Hardwell表演，佢就繼續留喺VIP區跳舞。