由杜琪峯、游乃海聯合監製，杜Sir導演，趙薇、古天樂、鍾漢良演出嘅電影《三人行》將會喺後日（星期四）上映。今次古仔飾演警察，追捕悍匪鍾漢良，其中一場講述喺醫院逃走嘅鍾漢良由高處墜下，古仔基於警察救人天職所以要救佢，古仔一手捉繩索，一邊落手扣捉鍾漢良，仲要講條用嚟救命嘅消防喉忽然下墜，認真驚險。

事實拍攝背後都係有驚冇險，鍾漢良因為要長時間倒吊充血，搞到塊面第二日爆微絲血管，但點傷都唔夠古仔差啲盲眼咁慘，話說佢有場同鍾漢良互相開鎗戲，為咗製造效果，現場會有玻璃破裂，古仔話：「當時大家互相開鎗，拍完之後好似覺得有啲玻璃入咗眼，我用水去清洗，過咗4、5日再去睇醫生，要挑起眼皮搵番玻璃出嚟，醫生話都好彩係幾日，如果唔係會割傷眼角膜。」

唔好以為淨係兩位男主角辛苦，其實趙薇都冇得倖免，佢唔止要有「仆街」戲份，喺倒吊場戲佢仲要扮拉住條消防喉救兩位男主角，拉完之後佢都話好似虛脫咗咁。

另外，今個暑假檔古仔有多部戲同時上映，其中一部《使徒行者》日前拍攝海報造型，以佘詩曼演嘅卧底釘姐揸槍款最多變，阿佘又會同上司吳鎮宇有曖昧情，不過鎮宇話拍之前話會有好激嘅咀戲，點知出嚟效果比電視劇仲保守。